د جبريل قول بسم الله…وتاني بسم الله..!!

* قاتل الله الاسافير التي تنقل الفتنة والسوء والضرر بين الناس…قاتل الله مواقع التواصل التي نزلت علي الناس بكل الاذية دون رقيب ولا حسيب.

* اشتعلت الاسافير هذه الايام باشعال الفتنة بين شعبي مصر والسودان وبين ابناء الغرب والشمال والشرق…لكن لان بيننا محمد احمد الذي يأكل حلالا ويشرب حلالا ولا يأتي الناس بالشبهات ولا يأتيهم زورا ولا بهتانا ظل يرفع يديه اللهم هدئ نفوسنا وطيب خواطرنا فيستجيب الله له فترتفع الحكمة عند البعض بيننا ونهدأ ونستغرب لماذا فعلنا كذا وكذا

ونعود….ولاننا اصحاب معادن طيبة وصادقين وبيننا المنافقين ونحمد انهم قلة …سريعا نعقل ونعود الا الذين امتلأت قلوبهم حقدا وغلا.

* د جبريل ده .. وزير المالية ..الزول ده مش سوداني…؟ طيب المشكلة وين؟ اذا كان خائن والله لن يصل لاي هدف يخطط له ضد الشمال….ولو كسر رقبته وان كان صادقاطالما في وسطنا محمد احمد صافي النية.

* ..تتداول بعض الاخبار هذه الايام ان جبريل يوزع مليون قطعة ارض للسكن العشوائي…جبريل علاقته شنو بالاراضي …..؟؟ اذا صدق القول علي جبريل ان يكف عن الذي يقوم به فلا وصاية لسوداني في وطنه…دع اهل دارفور يطالبون بحقهم مباشرة حسب القانون واللوائح المعمول بها في مصلحة الاراضي وانت اطلع منها.

* دارفور دي وين ؟ اليست في السودان ؟ …واهلها اليس هم بسودانيين المشكلة وين ؟…الحركة دي بتذكرني بلعبة قذرة حدثت ايام الانقاذ لي يوم الليلة قاعدة بما يعرفوا بجنوبي ابيي…لا معروفين يتبعون للجنوب ولا هم يتبعون للشمال لاعبين علي خطين….اي خطة خبيثة بتوقع انفصال دارفور لعرب الشتات لا قدر الله يضمن جبريل لسكان اقليم من خمسة ولايات في شمال السودان وحفظهم من التشريد بين ليبيا وتشاد ودول افريقية اخري .

* ليعلم د جبريل ان كانت هذه نواياه وخطته اننا لن نسمح بانفصال دارفور مهما كلفنا حتي ارواحنا رخيصة وليعلم ايضا ان اهل دارفور سودانيون اصيلين بالرقم الوطني الصحيح وانهم اصحاب حق في كل شبر من هذا الوطن وانهم يمتلكون بيوتا في ارقي مناطق السودان في كل ولاياته والخرطوم كذلك فلا داعي باشعارهم انهم مهمشين او حتي انهم مهضومي الحق .

* دع اهل دارفور يعيشون حياتهم الطبيعية في وطنهم السودان دون محاباة منكم انكم من تهتمون بشأنهم من اهل الشمال فجميعهم سواسية كاسنان المشط .

* اهل دارفور وكردفان يتعايشون مع اهل الشمال دون اي تفرقة بل هم الاهل والجيران والاصدقاء والوزراء واعضاء مجالس السيادة …وضباط الجيش والشرطة والامن وغيره من كل مفاصل الحكومة وهم عسكر السودان ..اذا ماهذه السلوكيات التي لا تشبهك اطلاقا وقد كنت اول المدافعين عنك هنا في الوهج زمنا وقلت انك وزير كامل الدسم وانك اعقل مما يتخيل اي شخص انك كفاءة تستحق ان تتولي علينا وزارة او حتي رئيس مجلس وزراء في اي زمان كان….لا تلبس جلباب عضو برماني يناصر اهله لاجل اعادة انتخابه مرة اخري لمقعد السلطة بتحقيق مكاسب لهم بفهم التهميش والعنصرية والجهوية التي نعرف ان اخلاقك ولا سلوكك يقبلها فانت رجل مسلم تبغض كل سلوك يفرق ولا يجمع.

* اخي د جبريل قول بسم الله السودلن للسودانيين واهل دارفور اصحاب حق نالوا حقهم كما يجب بل اكثر من اهل الشمال وانت خير شاهد علي ايوائهم واستقبالهم من اهل الشمال كما استقبلت اهل الخرطوم والجزيرة دون من او اذي او تجريح او ضيق…وهم راضون ومبسوطين قول بسم الله وتاني بسم الله.

* الموقف لا يحتاج الي شفقة عليهم وكأنهم اجانب بل هم اصحاب حق اصيل في كل السودان …بل كنا نتوقع منك ككادر متعلم وفاهم ونعتز بك ان تكون خير حكيم وخير بصير بتفاصيل الامور وان تتغلغل في اوساطهم بالحق بعيدا عن شبهات الجهوية والعنصرية ونحسب انك ابرأ من ذلك علي حد اعتقادي كاتب الوهج.

سطر فوق العادة :

د جبريل انت محل احترام وتقدير واعلم علم اليقين الحق اننا نعول عليك كثيرا ولم نفكر يوما انك ابن دارفور فكلنا دارفور وقد خدمنا في دارفور ولم نجد من اهلنا غير الاحترام خدمناهم بكل محبة وطيب خاطر وما زالت ذكرياتهم الطيبة فينا باقية…ولن تمحوها افعال اصحاب الفتن والقبلية البغيضة بل اهل دارفور اهلنا تصاهرنا منهم وتصاهروا فينا والبينا كل محبة …وهاك دي مني ليك …افرحني مدير السجل الوطني الزائر الي واشنطن في تكملة اجراءات اهل دارفور هناك الهجرية ان توقيعاتي علي ارقامهم الوطنية محل احترام ويثنون علي حسن تعاملي لهم وهم في دارفور قبل ان يذهبوا بارقامهم السودانية التي اخرجتها لهم والتي بلغت علي عهدي (350) الف رقم وطني انهم سودانيون اصيليون الي خارج وطنهم السودان كانت محل عزة وشرف اهلتهم لنيل الجوازات الامريكية بجدارة…..بالله تقول لي اهل دارفور مهمشين …مهمش انا يا د جبريل وليس هم ….قول بسم الله وتاني بسم الله السودان للسودانيين واهل دارفور سودانيون اصليون ونحن كذلك ..

(ان قدر لنا نعود)