حمير السياسة وحمر الساسة

عندنا في السودان، نوعين من الحمير، والفرق بينهم كبير،حمير السياسة

ديل الناس الغلابة كالمواطن الشايل

هم أهله في مدن السودان المختلفة أم درمان وبورتسودان ومدني والفاشر.

والصحفي القاعد يكتب بتلفونه المكسور، وما لاقي حق النت.

والمعلم، والدكتور، والجندي في الميدان.

ديل بيشيلوا البلد على ضهرهم، وبيتحملوا الحرب والجوع والنزوح، وما في زول بيقول ليهم شكرا.

أما حمر الساسة ديل مابشيلوا الوطن بل بركبوا على ظهر الوطن والمواطن

تلقاهو قبل الحرب بيقول “نحن مع الشعب ، وبعد الحرب بقول نحن مع حرب الكرامة

و بكرة لو السلطة تغيرت، حيقول “نحن مع أي زول”.

أهم حاجة عنده: الكرسي، والمخصصات، والعليقة مليانة.

يغير الحزب زي ما بيغير القميص، ويغير الخطاب زي ما بيغير الشريحة.

وهناك أمثلة واقعية في الواقع السوداني .

واحد كان شغال في نظام، الإنقاذ ولمن سقط النظام بقى ثورجي.

ولمن جات الحرب بقى محلل استراتيجي.

ولمن جات المنظمات بقى ناشط إنساني.

ده ما سياسي، ده حمار ساسة محترف، بيعرف اين البرسيم واين العلف .

وفي المقابل، في صحفي سوداني قاعد في خيمة في الدبة أو الابيض ، يصور ويوثق معاناة النازحين، وما عنده بطاقة صحفية ولا حماية ولا مرتب.

ده حمار السياسة الحقيقي، هو الشايل البلد، وهو المظلوم.

عموما السودان ما تعب من حمير السياسة، السودان تعب من حمر الساسة البيركبوا فوقهم منذ عام 1956 لحد الان .

كل حكومة بتجي بتركب نفس الحمير، وكل حزب بيجي بيقول حنريح الحمير، وفي النهاية تزيد الحمل عليهم.

والحل عندي هو أن حمير السياسة لازم يرفضوا يشيلوا حمر الساسة تاني.

المواطن والصحفي والمثقف لازم يقولوا: كفاية ركوب على ظهورنا ، انتهى عهد ركوب الظهور لتحقيق أهداف حمر السياسة الشخصية .