‫الرئيسية‬ مقالات مناشدة من قلب المواطن السوداني.. ارحموا من في الأرض يرحمكم من السماء
مقالات - ‫‫‫‏‫30 ثانية مضت‬

مناشدة من قلب المواطن السوداني.. ارحموا من في الأرض يرحمكم من السماء

عمر سيكا

كل يوم نصحى على زيادة جديدة..

كل يوم البنزين زاد، والجاز زاد، والغاز زاد، والدقيق زاد، والزيت زاد، والسكر زاد، والخبز نقص وزاد سعرو..

 

 

 

جالون البنزين بقى بـ 48,800 جنيه

أسطوانة الغاز متوقع تفوت 170 ألف جنيه و العيش 3 في الخرطوم ب2 الف وفي حلفا القطعة بقت 800 بدل 500

وفي كسلا 700

وفي عطبرة 3 عيشات بـ 2000

كيلو السكر 9 ألف

لتر الزيت 22 ألف

طبق البيض 46 ألف

ربع البصل 30 ألف

 

والمواطن مرتبه واقف، وشغله واقف، ودخله واقف..

يأكل من وين؟ يركب مواصلات من وين؟

المواصلات من الثورة للعربي بقت 13 و 14 ألف ماشي جاي!

 

 

 

يا حكومة الامل .. يا تجار.. يا أصحاب المحطات.. يا كل زول في يدو قرار..

*ارحموا المواطن يرحمكم من في السماء*

 

المواطن ده ما داير قصور ولا داير رفاهية، داير بس:

*عيشة تسدو.. وغاز يطبخ بيهو.. وبنزين يمشي بيهو شغلو.. ودواء لأولادو*

 

والغلاء كمل الباقي، والاحتكار والسمسرة زادت النار نارين.

 

المواطن السوداني صبر صبر ما صبرو بشر، لكن الصبر عندو حدود..

اتقوا الله في المواطن..

اتقوا الله في الأرامل والأيتام والنازحين..

اتقوا الله في الناس البتبيت جعانة وأولادها ببكوا من الجوع..

 

*نطالب بي:*

1. توفير الوقود والغاز والخبز بسعر معقول

2. رقابة حقيقية على الأسواق والمحطات ومنع الاحتكار

3. وقف الزيادات اليومية العشوائية في الأسعار

4. فتح الطرق وتأمين وصول البضائع للولايات

 

*المواطن ما عدوكم.. المواطن ده أخوكم وأبوكم وأمكم..*

 

اللهم إننا مغلوبون فانتصر لنا..

اللهم ارفع عنا الغلاء والبلاء والحرب..

اللهم من ضيّق على عبادك فضيّق عليه..

 

*#ارحموا_المواطن*

*#الغلاء_قتلنا*

*#الخبز_خط_أحمر*

*#السودان*

‫شاهد أيضًا‬

نأمل ألا يكون الجُرح في الكف..صريح بولس بعد اعتقال هارون..حراج عن قصد لقيادة الدولة

لم يكن وماكان وماينبغي لنا أن ننتظر مصداقية أو (شجاعة) في مسعد بولس مبعوث ترمب الأمريكي، ل…