ولنا راى صلاح حبيب زعلانين عشان الكهرباء قطعت!! الناس زعلانه عشان

الكهرباء ليها كم يوم قاطعة وزمان ما كانت عندنا كهرباء ولاثلاجات ولاغسالات اتومتيك او عاديه والناس بتغسل بالطشت وبتكوى بمكوة الفحم وكان الناس نظاف وجميلين زمان ماكانت عندنا كهرباء والمرأة بتلد تسعه وعشرة وبتلد في البيت. لاجناح خاص ولاجناح عام وبطلعوا أطباء ومهندسين والمابطع لامهندس ولا طبيب بكون احسن حداد وأفضل نجار وأفضل تاجر والماقدر يحصل. مراحل متقدمه من التعليم بمشي يقترب في السعوديه أو ليبيا او حتى اوربا وبرضو بتزوج وبنجب ببن وبنات وبطلعوا أطباء. ومهندسين وزمان ما كانت عندنا كهرباء وفي اشتغلوا في السكة حديد والنقل النهرى وفي الزراعه وبرضوا كانوا ناجحين وراضين بقسمة ربنا

زمان ماكانت عندنا كهرباء. البنات بتزوجوا افضل زيجة تمتد لاربعين يوم والحفلة بعدد من الفنانين وبضبحوا التيران والخرفان وبجيبوا فطور العريس وبرضوا يمشوا يقضوا. شهر العسل في إثيوبيا ولبنان والقاهرة والأبيض عروس. الرمال ايام. الخريف

الكهرباء قطعت وبتجى ومافاتنا شئ

والحرب جابه الله. عشان الناس. تتعلم وعشان الناس ما تتطاول. علي بعض اهو كل البيوت اتسرقت لاخلوا غسالة ولاثلاجة ولاملابس حنى البيوت الفيها اسانسيرات فكوها وشالوها والبيت رجع زيه وزى كل بيوت الناس

الحرب ربنا جابه عشان نعرف قيمة النعمة الكنا فيها ولانلعب بالأكل ونكبه في الكوشه

الحرب جابه الله عشان الناس تعرف كيف كانوا والليلة بقوا وين

الحرب بتقيف ان شاء الله نكون اتعلمنا منها شئ. لو بسيط كيف نعامل بعضنا البعض كيف التجار ما يغالوا في الأسعار وعشان الناس ترضى بما كتب الله لهم