عبد القادر ابوالقاسم يكتب    تقول لي انتهت؟؟؟

جيت خاشي بالتفتيش لقاني
واحد قال جيت بعد انتهت
قلت يا زول قلت كيف؟
والله حربنا يادوب ابتدت
رحلنا يوم طردونا منكسرين
ستفنا احزانا والحالة البقت
لملمنا باقي عمرنا واولادنا
ما عندنا الأمن ضاع وانفلت
ركبنا بكس الانتحار ماشين
كرامتنا في السرعة اتشتت
وجينا مارين بي هنا
كنت وين احوالنا اتعقدت
مرقونا من بيتنا بالقوة السلاح
كبادنا بالمغسة حريق انشوت
نزحنا في كل الدروب
والمسافات بعدت واشتكت
فقدنا فيها غاليين كتار
كرهو المسير أرواحهم اترجلت
في صحاري وبلدات بعاد
اتنعت فيها اندفنت انبكت
ولقينا أصناف من بشر
انواع صنوف اتعددت اتشكلت
فيهم الفارس التلب شيال
تقيلة لمن اشتد العنت
فيهم الذئب المفترس صياد
يتشفى تجريح ذلة وشمت
فيهم السمسار مهنة ودار
جيوبو الكبار ذنوبو اتملت
وفي ناس حنان ما عندهم
غير الدعاء وللخير سعت
بي نيتهم وسمح الكلام
وحلاوة الطيبة أمورنا اتيسرت
وفي نوعك يا سيد السؤال
القلت جيت بعد انتهت؟
جينا للبلد الحبيب جسدنا
يانا روحو الكان مشت
جينا نعمر ارضنا وبيوتنا
ادردرت ولينا بالشوق انكوت
جينا شان مستقبل عريض
راجينا وأماني زحمه اتلملمت
جبناها وجينا على عجل
خطانا لسة تقيلة اتاخرت
نسابق الزمن الجاي علينا
نحقق الكان تكون اتحققت
عشان أولادنا بعد العمار
وكل المشاريع فتحت خدرت
يجنو الأمان والرفعه توب
ووحدة بلد ثماره استوت
وتاني ما تقول لي انتهت
حرب الكرامة يادوب ابتدت