في رحاب الوطن  كتب /اسامة مهدي عبد الله انا سوداني انا 

مابين القطيه والبلاد وطن

ومابين الأرض والعرض وطن

وجه الشبه بين الهمباتي في وسط السودان ومابين قاطع الطريق في دارفور وكردفان في الستينات والسبعينات والي وقت قريب هي قيمه الحفاظ علي المبادئ والاحترام

لا يوجد قاطع طريق يسلب امراءة ، ولا يوجد همباتي يسلب امراءة .

مابين الهداي والدوباي نغم وشعر وفن .

مابين الفراسه والكياسه حكمه وحنكه .

جاءنا من جاء ، ونسي من نسي الارث والأصول ، هو السودان وكفي .

في وطني المرحبيب والدليب

المرحاكه و الدبنقا ،اللدايا والمشلعيب .

في وطني السودان ، الطينه والرمال ، الطلح والهشاب ، الصمغ والنخيل .

أنه السودان الذي فيه الدرب الاعوج والدرب العديل .

أنه السودان ارض الضفاف والنيل والبحر والحجر .

اقراءتم الي الاستاذ حسن نجيله ذكرياتي في الباديه .

اتعرفون الضأن الكباشي والضان الحمري والسعانين .

اتعرفون الارنب والوز والحباري .

اتعرفون جمال الرشاش ورحل القنيص .

في وطني الخواف ده ما منا وماهو سوداني اصيل .

هنالك في السودان هنالك رجال يأتي من صلبهم رجال .

وهنالك رجال يأتي من صلبهم اشباه رجال والنار تلد الرماد.

في السودان هنالك نساء اشجع من رجال .

وهنالك نساء يربين رجال أبناء رجال .

المربي علي الكرم في السودان عمره ماكان مامحترم .

والبخيل عندنا منبوذ عندنا وعمره ماكان اصيل .

من اين جاءنا هؤلاء ارتضينا بهم وهم ليسوا منا ، دخلوا فينا كالسوس التي تنخر في الخشب الصندل وأصيل الشجر ، اشاعوا بيننا السحت واضاعوا تراثنا ولكن هيهات ، هيهات أن يضيع تراثنا .

هل يضيع النحاس .

هل يضيع الطنبور .

هل يضيع فينا الدلوكه والنقاره .

لا والف لا .

الكرنك نغم

والدوباي والهداي فينا وفي كل حله ومدينه .

ابدا لن نخلع ثوبنا لنلبس ثوب غيرنا ونضيع .

من غيرنا نستفيد ولكن لماضينا وارثنا لن نضيع .

السوداني الماصل والمفصل هو هو السوداني بعلله وإصالته.

لكن الذين جلبناهم وفتحنا لهم ارضنا وفي ارضنا تركناهم صاروا اليوم زي ديوك العده ، لابد أن نجد لهم حل لكي نعود إلي اعاده هويتنا ، اصولنا ، جذورنا .

كانت هنالك الحبوبه وحجيتك مابجيتك ، وكان هناك التعليله ، وعلي ضوء القمر شليل ، والغناية والولايه والحكامه القومت في نفسها واهلها الفتنه وقامت في ارض الخراب والنيران كيوم القيامه .

بلدنا جميله ونحن شعب جميل ، بس نفهم بعضنا البعض يلتقي لون الابنوس مع لون المنقه ، ونشكل قوس قزح ، ويبقي كله جميل جنا عرب مع أسمر يجيب جنا في شكل منقه .

سلام ياوطن سلام