عبدالقادر ابو القاسم  يكتب              ونسة جبنة

اتلملمن نسوان الحلة في بيتنا

فجن الضيقة سوو الجبنة للونسه

ام الخير ماسكة المجلس براها    هارشاهن عديل زعيمت الشمار مُتريسه

تورق في خضرة الحلة عِزيل

اصلو من الخدمة ديمه مُتجرسه

قالت الخضرة ما زي زمان

الناعمة مفرهده يغريك خضارها وملمسه

شوفن زي دي عود يابس

وباقيهو فاضي يهرد قليبك بالمغسه

وحليل حلتنا زمان يا يمه

نملح نكملها ونلحق قعرها نلحسه

نطت ميمي بت ست البنات

قعرها يعني شنو حبوبتي يامدرسه

قالت ليها سجم خشمك الجاهلة

علام شنو الكمل سنينك عنسه

ما بتفرزي النضمي هيلينا ده

كلامكن الجبتنو كلو عجمي ووسوسه

غايتو يا بنات الزمن العلينا

قبلكن لا بتتبخن لا بتشيلن مكنسه

شوفي الخلقة كيف وشك ملون

وشعرك الناكشاهو ذي مجنونه مهلوسه

هسي خليهو قعر حلتنا دي

كان جنيت دلاقينك دي بلبسه

ما تقولي لي موضه وجمال

سمح العفاف والعفة سمح البلبسه

بهدلتكن دي ما بتجيب عريس

وزيك كدي لولدي تب ما بعرسه

اضايقت ميمي من الكلام الحار

حبت ترد لحبوبه برضو تحسسه

قالت انا ما بقراء تاريخ

بعد سمسترين بتخرج باش مهندسه

سمسترين حبوبه قالتها بعد تعب

ولعنت الجامعه والعلمها النطق درسه

حديثكن عجمي بقى كلو متكلف

خليتن العربي قايلات كلامكن فلفسه

قالت ليها اقعدي في البيت

كان يجيك العدل كراعك يحبسه

نحن زمان في بيوتنا مستورات

عشنا عزاز وكان مشاعرنا ندسدسه

يعني زي امك ستو دي

شافت ابوك بعد عقد عرسه

ستو خشت قطعت مر الكلام

عشان حبوبه حاره دايره مسايسه

امرقي انسلي يابت اتاخرتي

وامك الليله دمها فاير ومفلسه

واعملي حسابك خالتك بتول بوراك

ما عارفاها نايمه ولا مغنتسه

ردت بتول متكيه في البنبر

سامعاهو كلامكن كلو بيهو مستانسه

خلوها البنيه ياخواتي في حالها

والله واعيه محفوظه منو البلمسه

انتن ما شفتن ود حاج عجب

لا معروف بت ولا ولد خلقة مخنسه

لابس بنطلون جنز ضيق وناصل

تحلفي تقولي كراعو مكسوره مجبسه

وفنيلة في نص بطنو مشنوطه

شيتاً غريب لماعه شينه مكرفسه

يلوك في اللبان زي البنات

لابس حلق وغويشه حتى بمحبسه

في مشيتو يتنى يتمايل ويتمايع

ارجل منو سعاد امو الحارسه

في عز نقتن وشمارن داك

فتح باب الحوش ابوي بمسايسه

واتنحنح قوي صفق وناغم هي اصلو عاده من زمان متلبسه

اصلو ما بطيق لمة حريم   وزي التقول امي زاتو ما جكسه

قامن الحريم على الباب جري اولن ام الخير ست المّْرَيَسه

في الباب جنس دفر ومداوسه للمرقة سبق ضرب خجيج ومكابسه

وواقف ابوي زي الأسد النتر  لا طايبهن لا واحده فيهن حنسه

معروف ابوي ياكا المربي والمثل قالو البيزرع يحصد ثمرة البغرسه

اصلو ما ضاق حرام في يوم امانتو وشاح والسمعه حياتو بتنفسه

ثوب الفضيله هدم عزة وفخار

وتاج الوقار عمة هيبة لابسه

ما سكا غش الدنيا يوم وللفارغه صادي هواه نفسو مترسه

ولد وربى خايف من الكريم بضاعتو أجيال صلاح منو البِبَخّسه