كده بالمنطق كده..فهموني…!!

* بالمنطق كده …فهموني المنشق قبة جاء قنعان من المليشيا لينضم للجيش بي قناعة تامة وللا نص نص…؟ حقيقة شوية بعيد عنكم الاستيعاب عندي تعبان من الثانوي القصة دي ملازماني حتي اليوم ..خاصة في الكيمياء والفيزياء.

* كده فهموني… قبة ده لسه في المعدة بتاعته طعام لم يهضم بعد من طعام الامارات الذي تزود به المليشيا ..هل ممكن يدور مع الجيش طوالي كده بدون يخلص هضم طعام الامارات حتي ؟؟؟؟ من يضمن قبة بعد ان نما لحم اكتافه من المليشيا فجأة يأتي صادقا هكذا ..هوي انتبهوا..!! من حقنا نخون قبة ياخ ده خانا تلاتة سنين ..ليه ما نخونه ونشك فيه ؟؟.

* قبة هل سلم سلاحه الذي يتبع للتمرد للقوات المسلحة والذي كان ايضا مع افراده….وهل افراده يحملون السلاح حتي اللحظة والله قالوا كده….المواطنيين شافوهم لابسين زي الدعم السريع وبي سلاحهم حايمين في ام درمان وقالوا اتصوروا فيديوهات …الله ستر المواطنيين ما لموا فيهم كتلوهم… المواطنيين مغبونيين منهم..ياخ الناس ديل كتلوا اولادهم واخوانهم واباءهم وامهاتهم واغتصبوا بناتهم قدام عيونهم تفتكر يسكتوا ؟

* هل الاستخبارات تهدف لامر نحن لا نعرفه من ترك هؤلاء المنشقين في الهواء الطلق…يتجولون وكأنهم بشر طبيعيين لم يقتلوا او يسفكوا او يغتصبوا او يسرقوا او يشفشفوا حتي امس الاول؟.

حقيقة ما قادر اتصور القصة دي ما قلت ليكم بعيد عنكم الفهم تقيل شوية.

* طبعا لو عارفين وساكتين مصيبة …ولو ما عارفين معناها نحن لحقنا امات طه..قبة ده لواء مش كده؟ يعني وصل لواء بالتدرج من ملازم وكده وللا (هب لب ) لواء طوالي؟ ياربي ناس بقال بسموها شنو الحالة بتاعت قبة دي !!…اها لواء خلا ايوه لانه كان بقول لي واحد مقدم اسمه عيس مقدم خلا عيسي….بقال ذاتو قالوا وصل فريق ياربي بعتمدوها ليه بعد يرجع؟ بقال قالوا بقي هندي…مشي الهند وانا نصحته قلت ليه تاني يا بقال ما تجي وجودك خطر في السودان .

* لكن ما صعب علاج القصة دي ..زمان كان بجيبوا ناس بستوعبوهم ضباط فنيين حسب تخصصهم وحسب مؤهلاتهم والحاجة اليهم في القوة بحددوا ليهم الرتبة ويخضعوهم لتدريب ستة شهور ويخرجوهم ضباط ورغم ذلك الضباط البراءة ما بعترفوا بيهم بقولوا ليهم الملكية يعني ما عسكريين مية مية….ياربي قبة ده مؤهلاته الاكاديمية شنو ؟ المهم لو جامعي ممكن يتجاوزوا ليه بعمله الميداني قبل ان يخوض الدعم السريع حربه اللعينة …يتجاوزوا ليه مطلوبات لواء عسكريا….لكن والله صعبة القصة عشان تصل لواء داير ليك تلاتين سنة خبرة ممتازة واداء نضيف في العسكرية عشان تبقي لواء.

* ياخي حميدتي (قالوا ) كان بفتش لي مساعد شرطة …ناس الشرطة ابوا يدوه لانه ما كان مؤهل وفاقد تربوي ..الحد الادني من التعليم ما عنده….فجأة كده بقي فريق اول وكان ماشي لي مشير لولا ارادة ربنا جهجهت باكاته .

* نحن بقينا ما فاهمين الوضع وللا الوضع ما فاهمنا ما عارفين…..اوريكم الحل اي زول جاي من الدعم السريع منشق وكان خائن حتي امس …النوع ده ما تأمنه.. الخان مرة يخون عشرات المرات …عشان كده لابد من اعادة صياغة شخصيته من جديد واعتباره ملكي…ادوهم تعلمجية (راضعين لبن امهم) في الكلية وافصلوهم تماما من المجتمع زي ما العسكرية قالت (كونفاين) (45) يوم وبعدها كل خميس وعودة الجمعة لمدة ستة اشهر عدا الاعياد اذا تصادفت …غير كده يبقي ده لعب عيال ساي…وخصما علي روح العسكرية التي نعرف.

* ابعدوهم من رئاسة الجمهورية البرهان وكباشي والعطا…وجاير…. صداقات ومعارف قديمة دي ما بتنفع والله البرهان بالغ في (قلدته لي قبة يوم داك) ما تخلوهم يشوفوهم الا يوم التخرج فقط وبعدها الا في الجرائد والتلفزيون …ياربي قبة بعرف يقرأ جرائد …لانه شايف حميدتي قائدهم كان امي …ده الكلام السمعناه …ووضعه بأكد كده.

سطر فوق العادة :

شوفوا …عاوزين الجد وللا ابن عمه ما في حاجة سقطت حجر الانقاذ الا تساهلها في كثير من الامور ورخي الحبل واحيانا تركه علي الغارب ….ده الوصلهم القاع الماطلعوا منه تاني…رغم نصائحنا ليهم.. اعتبرونا ناس اي كلام .. نصيحتنا ليكم انتو كمان ..جروا الرسن خاصة في شأن العسكرية (النية) .. مافي لعب ولا تهاون ….عسكرية يعني عسكرية وللا ادوهم وظائف وزارية وخلوها تجوط زي ماهي جايطة لكن العسكرية دي ما تتهاونوا فيها عسكرية يعني سلاح وسلاح يعني موت …المشكلة ما هنا المشكلة في كيكل برضو …موقفه كيف؟؟وموقف الدروع …غايتو الدخلت في السودان وعسكريته تمرق….لا حول ولاقوة الا بالله .

(ان قدر لنا نعود)