بالدارجي كدا …. ماقبل المضادات والجيش صاحي  مصعب محمد خير

من الاول كدا الناس تبرد ولاداعي للهلع والخوف لانو المليشيا ماتقدر تتقدم في استهداف الشمال عموما وآخر ماعندها الاستهداف بالمسيرات ودا موضوع مقدور عليه والمضادات شغااااالة …..

*لكن خلونا نركز في خطوة ماقبل المضادات وهي الاحتياطات اللازمة والتأمين*

التفيش والارتكازات ….

من هنا يكون الحسم حتى نقدر نضبط الداخل مانقع بكرة في تشكيكات المسيرات. جات من الداخل ومن كدا وكدا ودخل من وين وقامت من وين ..

بنقول الارتكازات لازم تكون طول اليوم مباشرة وكل مايمر بالطريق يتفتش تفتيش دقيق جدا حتى لو اتضجر المواطن لازم يخضع لتعليمات الارتكاز من دفارات البضائع والجرارات والتلاجات المصرية العابرة للطريق الى التكاتك والرقشات والمواتر بدقة.

حتى البضاعة تنزل أرضا للتفتيش و الشاحنات الكبيرة يطلع فيها المستنفرين الاجهزة المتواجدة في الارتكاز تتفتش في العربية وتترفع المشمعات التفاتيش دي تشمل كل المداخل والمخارج للمحلية وكذلك الطرق الداخلية …

*طيب الارتكازات قامت بكل التفاصيل دي وشددت الخناق .. اها شغل الاحياء* كيييييييف …..

يلا دا دور الشباب في الاحياء واللجان ودور المواطن في رفع الحس الامن ودا اهم دور في كشف الخلايا النائمة والمتعاونين بالتعاون مع الارتكاز القاعد بالحي او الفريق في المعلومات

يعني الناس في الأحياء تكون صاحية وتبلغ عن كل مشتبه فيهو او سكن فيه شي مريب او مجموعة طالعة نازلة في شارع الحلة وما معروفين

لازم حملات تفتيش في الأحياء للبيوت المؤجرة للوافدين في الفترة الأخيرة ومراكز الايواء والمزارع والكمائن …..

كمان نركز علي المستشفيات والخلاوي والاسواق والاماكن العامة

الاهم والغافلين منه لابد من وجود كوادر نسائية للتفتيش الدقيق في البيوت لانو دور المستنفرات في التفاتيش مهمل جدا وممكن تكون المليشيا مستغلة الوضع دا انو النسوان مابفتشوا في الارتكازات فعشان كدا يا لجنة المرأة عاينزك في الارتكاز وتطلعي لينا البصات للنسوان ديل ..

في حقد دفين على الكرم والطيبة والأصالة العند انسان الشمال فلازم شووووية كدا نتخلى عن اخلاقنا العالية وطيبتنا الزايدة عشان ما نفرض في بلدنا

ولينا تكملة………..