قصيدة في رثاء قريبة لي من البركل. عادل عسوم

نزف الوريد

والذكرى تجْرَحْ في الحشا، مُنجل حديد

فَرَضَ البراسيم قبل أوانا وتاني ما قام من جديد

قطَعَ القلب من تمرة

بان عرجونا ريقان من بعيد

يا نخلة فوق القيف تشابي،

والرقيص بي تلّة إيد

والنسايم تنتني وتركز تشيل شبّالة أَخَدَر من جريد

والجرف باللوبي متشابك

خدارو على الهدوم والليد

خيرو علي أهلنا كتير

قرون ويكي، وراس واقود

و زير وسطاني كان كركجي

تنقع مويتو، جمبو كبيق

شمالا في نعيمو ربينا

آب ينكر جميلو إلا شليق

تصل في مروي بالشريان

تشوف جبلا

يسد عين الشمش بي إيد

تعاين تلقا بعدو النيل

يلف يرجع

أكيد من شوقو ليهو شديد

شلتي من تالاهو سُمرة،

ومن شموخ تاريخو شمعاتك تقيد

يا أَسِّقَة خوليو وبعانخي

وفي الحسب ترهاقا جدك مو بعيد

إنتي ما ريناس (أماني)

ملكة حارساها الأسود

مكتوب علي الباب الكبير

كاف بالدهب،

ومعاها نون،

وراها دال ممدودة مد،

وتاني كاف،

مقفولة تاا، مليانة ريد.

(كنداكة) لابسي التاج

وبين ايديكي واقفين الجنود

لكن خلاص نزف الوريد

من يوم حريم بركلنا قالن حي وووب

سكتن قماري الساب وماقوقن

وطير الجني قام دقش الصعيد

ياجبل بركلنا وين بالله فاتت؟

طمني لو عندك جديد؟

نزلت دموعو بقت رمال،

بي إيدو أَشّر والشريمي بقَتْلُو إيد

في الطرابيل جيتي أهلك

وفي (رقاد الميل) بقيتيلُن رفيق

أبقي طيبي في بكانك

وليكي ندعو، كلو ساعة

وكلو عيد

وفي مراقدك من جنان رضوان يجيكي الهمبريب.

adilassoom@gmail.com