من الواقع

صديقة عمري من ايام المرحلة الابتدائية عندها بنت اسمها منال عمرها ٢٥ سنة بنوته جميلة شكل وروح وخفة ظل.. عندها أمانة قول وفعل ومكافحة وجدعة وخدومة انا بعتبرها بنتي حاصلة على معهد فوق المتوسط واشتغلت في إحدى المصانع الخاصة بالخياطة وكانت حياتها جميلة مقبلة على الحياة وحياتها طموح وتفائل ومرح وسعادة كان لها زميل في الشغل قمة في الأخلاق والرقي في المعاملة مع الجميع معجب بيها جدا جدا وقرر يتعرف على والدتها وطلب من منال تحدد يوم يقابل فيه والدتها ويتعرف عليها صديقة عمري رفضت انها تقابله منال بكت بكاء شديد وحاولت مع امها ولكن الام أصرت على الرفض سألت صديقتي وقولتلها منين عايزاها تتجوز ومنين ترفضي شاب على خلق قالتلي جملة غريبة العريس ابوه وامه منفصلين لو غلط فينا وعمل مشاكل نروح لمين مع ان العريس كان بتربطه علاقة طيبة بوالده..

وطبعا صديقتي كان كل اللي شاغل بالها ازاي بنتها منال تنسى زميلها.. وبما ان صديقتي مولودة وعايشة فى القاهرة بس واخدة طبع الارياف لان جذورها من الفلاحين وعندهم البنت لازم تتجوز بدري المهم اتقدم لها ابن ابن خال امها اللي هي صديقتي.. العريس مولود وساكن في الارياف البنت وافقت على العريس علشان تخلص من ذن وقلق امها وفي أيام الخطوبة الولد دخل عليهم راسم الولاء والطاعة والادب والحياء والأخلاق العالية وحصل كام موقف ايام الخطوبة واضح وضوح الشمس وبيأكد ان الجوازة فاشلة بس صديقتي والبنت تفكيرهم عقيم ومحدود داسوا دماغهم بحجة مش عايزين حد يشمت فينا جملة في منتهى السخافة وبسببها ممكن تسود الدنيا واللي بيشيل قربه مثقوبة بتمطر عليه المهم الموقف الأول بما ان العريس مقيم في الارياف زيارته لمنال بتكون يومين مبيت وهما متجمعين منال والعريس وأخواتها وامها وابوها منال قلعت الدبلة لأنها ضيقة وبتقول لخطيبها الدبلة ضيقة جدا لبس الدبلة في صباعة الصغير ونزل مع منال بحجة انه هايشتروا عشا رجعوا الاتنين وقالوا الدبلة ضاعت الله اعلم ياترى باع الدبلة واخد فلوسها بعلم منال ولا ضحك على البنت وأهلها لانه الفترة دي كان عاطل…

تاني موقف بعدها بشهرين نزلوا هما الاتنين وسط البلد يشتروا خامات للخياطة وهما في الميكروباص اخد منها التليفون بحجة انه هايعمل مكالمة بعد ما خلص المكالمة نزلوا سألته منال على التليفون قالها انا تركته بعد ما خلصت المكالمة بيني وبينك في الميكروباص على الكرسي علشان تاخديه انتي اللي مش واخدة بالك نزلتي بسرعة وسيبتيه.. برضو الله اعلم هل تمثيلية بين منال خطيبها على اساس ان كده بتساعده ماديا ولا خطيبها ضحك عليها… الموقف الثالث كان في فرح في العيلة عند العريس ومنال سافرت مع أهلها تحضر الفرح صديقة عمري ام منال شافت العريس المبجل بيشرب خمرة واجهتوا قالها لا يا عمتي مش انا اللي بشرب كدب عيونها بكل بحاحة.. رابع موقف صديقة عمري سمعت من البلد ان خطيب بنتها سرق دهب عمته

قالت ايه صديقتي اللي عايزة تجوز بنتها والسلام دا بيضحكوا عليا ولا سرق ولا حاجة دول غيرانين وعايزين الجوازة تبوظ.. كل دا في الخطوبة الغريبة ان البنت وامها كانوا متخدرين والولد قدر يوهم منال ويضحك عليها باسم الحب وانه بيعشقها وبيحبها وبيموت فيها وبيخاف على مصلحتها .. تم الزواج وانتقلت منال من القاهرة مسقط راسها الي الارياف..انتظروا المفاجأة في الجزء التاني العدد القادم بإذن الله.. تحياتي