حربٌ أخرى.. حرب قطع الأرحام

في عز الحرب، الناس كانت بتفتش على بعض، الأخ بفتش على أخوه، والأم بتفتش على ولدها، والجار بفتش على جارو.

الحرب علمتنا إنو الأهل هم السند، وإنو الرحم هو الوطن الصغير.

لكن المؤسف، بعد ما بدينا نرجع ونتنفس، ظهرت حرب تانية، أخطر من حرب الرصاص.. حرب *قطع الأرحام*.

بقينا نسمع عن أخ مقاطع أخوه عشان ورثة، وأخت مقاطعة أختها عشان كلمة، وولد مقاطع أمو وأبوه عشان مصلحة، وقريب مقاطع قريبو عشان خلاف في الفيس بوك!

يا جماعة، ده ما كان طبعنا، ولا دي أخلاقنا، ولا ده ديننا.

ربنا سبحانه وتعالى قال: _”واتقوا الله الذي تساءلون به والأرحام”_

والرسول ﷺ قال: _”لا يدخل الجنة قاطع رحم”_

الحرب شالت مننا بيوت وأموال، لكن ما مفروض تشيل مننا أهلنا ورحمنا.

اللي بيقطع رحمو، بيقطع رزقو وبركتو وعمره.

أنا *عمر سيكا*، بقولها على الملأ:

تعالوا نوقف حرب قطع الأرحام، تعالوا نتصالح، تعالوا نرجع نزور بعض، نتلفن لبعض، نسأل من بعض.

لو عندك قريب زعلان منو، الليلة قبل بكرة، أرفع تلفونك وقول ليهو: “أنا آسف.. عفا الله عما سلف”

الوطن ما بيتبني بالسلاح بس، الوطن بيتبني بصلة الرحم والمحبة والتسامح.

خلونا نرجع زي زمان.. أهل واحد، ودم واحد، ورحم واحد.