عبد القادر ابوالقاسم  يكتب     بتغزل فيك

ينكتب فيك اشعارنا
نصرح ليك هويناكي
نقول كلماتنا في غزلك
بالاحساس جد عشقناكي
ومهما يقولوا في حقك
محال نتجافى نسلاكي
وكيف نسلى وانتي
غنانا والهدايا والحاكي
ضفايرك امتداد نيلين
وحاضنه السمره في حماكي
وزرقة بشره ما احلاها
تجمل طلة اهداب جفناكي
عشقنا ترابك الاغبش
وسحر النيل ونضار رباكي
عشقنا الخضره والنيلين
ولمعة نجمه في سماكي
عشقنا العزه يا عزه
تجلى الباري ابدعك سواكي
ولو جارت عليك ايام
نجاهد فيك نتسابق نفداكي
اصطفينا في الميدان
اتزينا ليك كفن كاكي
روحنا هديه لي مهرك
–    ودمنا ليك مسك زاكي