في رحاب الوطن  تشابه افريقي عربي في زمن العولمة كتب /اسامة مهدي عبد الله 

زمان في الخليج كان يقال الريوقه ، في السودان يقال فك الريق ، في دول أخري حلي بقك ،اي فمك .

كان السائد شاي المساء وغالبا مايكون هذا الشاي بلبن مقنن اي فيه شويه تقنين يعطي اللبن مع الشاي نكهه ، في دول أخري يسمي شياط كما في مصر ، وطبعا احلي شي لشاي المساء البسكويت أو البسكوت ، أو الكيك ، في افريقيا يشربون هذا الشاي المقنن بقطعه رغيف ، وتكون ياداب طالعه من الفرن ، اي تم إخراجها من الفرن ، هنا المتعه واللذه ، هناك شاي المساء وممكن يكون بعد العصر وقبل المغرب ، وممكن يكون بعد المغرب ، وهناك شاي احمر ، وشاي اخضر ، شاي فلت اي شاي ورق علاق زي اللبتون ، أو غيره ، وشاي حب ، وكله بمشي النار وممكن يتخلط مع اللبن الذي ممكن يكون حليب ، بقري أو جاموسي ، وممكن يكون لبن بودرة ، طبعا عند الطبقات الراقيه ، أصحاب المال ، وأصحاب الرصه والمنصه ، الشاي بتاع المساء بختلف ، طبعا شاي جمال الوالي ، مازي شاي الوالي ، وشاي الكاردينال ، مازي شاي المعتمد ، وشاي اولاد البرير مازي شاي ناس وادي دما ، وشاي اولاد البربري ، مازي شاي ناس لفه سوق الستيب ، وشاي اولاد الرياض ، والعمارات ، ومدينه النيل ، مازي شاي ناس ام جناح ، مع هذا كله شاي وفي المساء مع اختلاف المواقيت الزمانيه والمكانيه وفروقات الوقت والزمان ، في شاي يقدمه الخدامين وفي سفره متحركه وده نظام اناقه واتوكيت ، المعالق لون ، والاناء الخاص بالشاي ،شكل ، والخاص باللبن شكل ، ذهبي ، فضي ، غيره ، وشاي الغلابه ومتوسطي الدخل ، كله في بعضه ، مافيش حد بخدم حد شعارهم اخدم نفسك ،بنفسك ، ممكن كله في إناء واحد لبن زايد شاي والكوب زجاج أو بلاستيك ، وكله ماشي والله حافظ ، في النهايه اسمه شاي المساء ، في السودان وفي اي مكان ، وممكن يكون شاي باللقيمات التي تسمي منون وماعارف من اين جاؤوا في غرب السودان بهذا الاسم ، ممكن عشان شاي المساء المقصود فعلا وقولا هي امنيه البعض ، لهذا سموه منون بشد النون ، وفي النهايه كلنا سودانيين والسودان بلدنا وكلنا سوا .