وهج الكلم د حسن التجاني شرفتنا …ياريس…!!  القاهرة : رحمة عبدالمنعم ..الرياض د حسن التجاني 

* أكد رئيس الوزراء الدكتور كامل إدريس أن زيارته الرسمية إلى جمهورية مصر العربية (ناجحة بكل المقاييس) ..نعم ناجحة وفي زول يقدر يقول غير كده…الا يكون عديم السمع والشوف…. مشيراً إلى أنها أثمرت عن تفاهمات مهمة تشمل تسهيلات في إجراءات التأشيرات، وتيسيرات كبيرة للطلاب السودانيين، وحل قضية المواطنين السودانيين الموقوفين في السجون المصرية لأسباب هجرية، عبر ترحيلهم إلى السودان…..(شوف سعادتك النقاط التي طرحتها وكانت معك في حقيبتك الفكرية التي ذهبت بها الي هناك لهي كافية جدا ان تجد سعادتك كل احترامنا وتقديرنا).

* وأعلن رئيس الوزراء، في لقاء مع القيادات الاعلامية عقده مساء امس الخميس بمنزل سفير السودان بالقاهرة، الفريق اول مهندس عماد الدين عدوي وقدمه الاستاذ محمد عبدالقادر ، أن الحكومة ستتكفل بتسيير 500 بص للراغبين في العودة الطوعية إلى السودان، مع تسهيلات على مستوى المعابر والربط الكهربائي بين البلدين، موضحاً أن ديون الربط الكهربائي تبلغ 110 مليون دولار، وأن الحكومة تعمل على وضع خطة شاملة لإعادة الإعمار، مشدداً على أن إعمار البلاد أولوية قصوى.( شوف سعادتك خلينا من الاعمار ده حسي…شوف الكهرباء الذكرتها دي لو حسمت امرها ستدخل التاريخ السوداني عبر اوسع مجلداته التاريخية).

* وفي الشأن الزراعي، بشّر إدريس بنجاح الموسم الزراعي وتوفير كل احتياجات المزارعين، كاشفاً عن زيارة مرتقبة لمشروع الجزيرة الأسبوع المقبل، وأشار إلى أن الحرب خلّفت دماراً واسعاً، لافتاً إلى أن مصفاة الجيلي تحتاج إلى مليار ومائتي مليون دولار لإعادة تأهيلها بعد أن تعرّضت لدمار ممنهج من مليشيا الدعم السريع، التي نهبت المعدات لاستخراج النحاس.

وأكد رئيس الوزراء أن الأوضاع في أم درمان تسير بصورة ممتازة، وأصبحت أكثر إضاءة من باريس ( ما للدرجة دي يا سعادتك لكن لو نفذت مشروع الكهرباء مع مصر ممكن تكون زي شوارع مصر مثلا والله جد)… وأن الحياة في بحري تمضي بنسبة 80%، بينما تحتاج الخرطوم ووسطها وشارع النيل إلى إعادة تخطيط شامل، …( لا يا سعادتك معليش قول (60%) معقولة شوية… بحري مازال جرحها ينزف سعادتك).. وكشف أن الرحلات الجوية الدولية ستعود إلى مطار الخرطوم خلال شهرين…( الكلام ده ممكن با سعادتك يكون منطقي لو شغلتوا مطار الخرطوم من جهة الجنوب… مطار سفريات الحجيج …لانه لم يتضرر كثيرا …اما جزء شمال المطار عاوز صبر شوية نكون واقعيين سعادتك)

* شدد إدريس على اهتمامه بملفات الكهرباء والمياه والصرف الصحي، وتقنين الوجود الأجنبي، وبسط الأمن، ( شوف يا سعادتك لو فعلا صح عاوز فكرة بسط الامن تصبح واقعا معاشا اضمن لينا استمرارية تنفيذ عمليات مكافحة الوجود الاجنبي غير المقنن وترحيلهم لدولهم…غير كده الكلام ده قالوه قبلك ناس كتار كانوا قاعدين في مكانك ده…. شوف يا سعادتك لو عاوز تختلف منهم ركز في التنفيذ والاستمرارية بي كده بتكون عزيتنا شديد ورجعت لينا سيادتنا نحن سيادتنا دي اهم لينا من الكهرباء …لا لا ياسعادتك بمزح ساي الكهرباء مهمة واصل كفاحك فيها) ….واصل يا رحمة تقريرك الجميل ده عن الزيارة..بالمناسبة المكتوب بين الاقواس ده كلامي انا ..عشان ما تظلموا رحمه عبد المنعم وهو صاحب التقرير الراقي ( تعيش الكرامة). . ويعيش محمد عبد القادر)

كما بين أن الحكومة ستعود بكامل مؤسساتها من بورتسودان إلى الخرطوم في شهر اكتوبر، وأن عدداً من الوزارات – بينها الدفاع والداخلية والصحة – باشرت بالفعل أعمالها من العاصمة….( الشرطة دي اصلو حمالة تقيل ….والله لو وزير العدل بس أمن ضهرها بالحماية من ان يطالها القانون القاسي اثناء اداء واجبها….اقسم بالله تنوموا وبيوتكم ابوابها فاتحة للصباح …بس نص واحد في مادة واضحة تجاز في قانون الشرطة لا جريمة في مواجهة اي شرطي اثناء اداء الواجب …ببلاغ ضده…ناس الشرطة بعرفوا يصيغوها صح وبجيبوها ليك جاهزة للتوقيع ياوزير العدل..ما يبقي كلامك وعود ساي)…(الشرطة مشت الخرطوم بي وزيرها عقبال ناس مني العجبتهم بورتسودان) .

* وأشار رئيس الوزراء إلى أن حجم الضغوط والتقاطعات داخل أجهزة الدولة كبير، وأن “الطابور الخامس” متغلغل في بعض مفاصلها، مؤكداً أنه يعمل أكثر من 22 ساعة يومياً في ظروف استثنائية، وأنه “ليس بالإمكان أفضل مما كان” في هذه المرحلة…( لا تستسلم يا سعادتك.. شنو تقاطعات ؟ معقولة؟؟ البقاطع اقطعه منو العارضك في القطع…الشعب عاوز القطع لاي مقاطع معاك (45)مليون نسمة عاوز شنو تاني.

* وعن الجمع بين منصبي رئيس الوزراء ووزير الخارجية، قال إدريس إنه لا يستطيع القيام بالمهمتين معا حاليا…( طيب ليه وزيرها مافي ؟…انا ذاتي قلت كده انك ما بتكون فاضي ليها مهامك جسام …بالمناسبة المستشار لا يستشار هكذا يقولون …استاذ محمد محمد خير ما بطال…ممكن تجي منه حاجة لكن شايف العقيد نميري من الجمارك رسل ليك رسالة قوية زي التقرير الامني قال مستشارك التاني ده حراميييي عدييييييل. باثبات …كيف الكلام ده ؟ اما تحاسبوا النميري اذا لم يثبت ذلك الاتهام….او تعفي مستشارك ده يا سعادتك…بعدين داير اقول ليك كلام… انت ذاتك ماشاء الله عليك ما محتاج مستشار لو قلت بسم الله وتوكلت بتنجضه)…

* وتطرق إلى الى ان وزير الثروة الحيوانية والسمكية البروفيسور أحمد التجاني، لن يستمر فى الحكومة،…( عين البديل طوالي منتظر شنو ؟ حواء السودانية والدة ….فيها ناس بعرفوا ليك لغة السمك خليك من الثروة )

* ونفى وجود أي تفاوض مع دولة الإمارات، ..( انت متأكد يا سعادتك مافي تفاوض…!! والله جد…!! والله يا سعادتك حتي كلمة تفاوض دي مخجلة….تتفاوض مع منو وفي شنو ولي شنو؟؟؟) انت عارف مجرد الجلوس للتفاوض معناه شنو؟؟؟ معناه اعادة الوسخ بعد نضف جسد الوطن).

* واكداً أن وزارة الخارجية تتحرك بقوة لعودة السودان إلى دوره الطبيعي في القارة الإفريقية.

وفي ذات المؤتمر، أوضح وزير الدولة بالخارجية عمر صديق أن مجلس السلم والأمن الإفريقي سيصدر بياناً يعترف بحكومة “الأمل” التي يقودها الدكتور كامل إدريس….(انت يا سعادتك الاستاذ عمر صديق ده ما ينفع وزير كامل الا وزير دولة بس….القصة دي ما واقعه لي في راسي…)

سطر فوق العادة:

بالمناسبة د كامل ادريس امس في مصر ابدع عدييييييييل كده….ياخ ده قدم خطاب من راسة مرتب كيف واستراتيحي كيف …جل مالك الملك…اثبت انه هو الرجل المشرف دوليا واقليميا ومحليا…والله شرفتنا ياريس .

(ان قدر لنا نعود)