‫الرئيسية‬ مقالات أبوسعد – الفتيحاب.. موطني الصغير الذي يستحق الأفضل
مقالات - ‫‫‫‏‫7 دقائق مضت‬

أبوسعد – الفتيحاب.. موطني الصغير الذي يستحق الأفضل

عمرسيكا

في الأيام الماضية، تحدثت عن هموم مواطن الخرطوم، وبصورة خاصة مواطن *أبوسعد – الفتيحاب*، موطني الصغير.

 

ما عندي مشكلة شخصية مع زول، وأقسم بالله لا مع *الوالي أحمد عثمان حمزة*، ولا مع *المدير التنفيذي لمحلية أمدرمان سيف الدين مختار*. لو عندي مشكلة شخصية كان سكيت من زمان.

 

مشكلتي هي *المصلحة العامة*، وبس.

 

*1. لجنة أبوسعد للأراضي التاريخية*

نحن بنتكلم عن تكوين لجنة أبوسعد للأراضي التاريخية، وعن التواطؤ – حسب ما نراه على أرض الواقع – في طريقة إدارة ملف الأراضي. أراضي أهلنا التاريخية ما لعبة، وحقوق الناس ما بتتوزع بالمجاملات.

 

نطالب أن يكون الوالي والمدير التنفيذي قريبين من *أصحاب الحق الحقيقيين*، الناس الما دايرين شي لنفسهم، دايرين حقهم وبس، وأن تُضرب أوكار الفساد – إن وجدت – بيد من حديد، وبالذات في ملف *توزيع القطع*.

 

*2. حدائق الفتيحاب.. حبيبي مفلس رجعت ليها الفوضى*

حدائق الفتيحاب التي سماها الناس “حبيبي مفلس” رجعت ليها الفوضى من جديد.

 

الحفلات رجعت في الحديقة المطلة على مبنى الاستخبارات، وهي أكبر مساحة، والحدائق الأخرى أصبحت محلات شيشة وجلسات قهوة وشاي، والمنظر لا يسر الناظرين.

 

وكل الناس عارفة الدخل البحصل شنو جوة الحدائق دي. نحن ما بنتهم زول ساي، لكن بنسأل: *أين الرقابة؟ أين المحلية؟ أين القانون؟*

 

نريد خرطوم آمنة بدون فوضى، ونظافة في كل مكان.

 

*3. رسالتي للوزير السابق*

أنا بشكر الوزير السابق الكتر خيرو، الدخل علي في الخاص وسألني: مشكلتك شنو مع الوالي والمدير التنفيذي؟

 

وضحت ليهو بكل شفافية: مشكلتي ما شخصية، مشكلتي إنو الولاية مهمشة منطقة أبوسعد، وإنو في فساد كبير لازم ينكشف، ولازم الوالي والمدير التنفيذي يكونوا مع أصحاب الحق، ويقيفوا مع المظلوم، لا مع المستفيد.

 

*نحن بنتكلم بشفافية:*

نريد والي قريب من المواطن، ومدير تنفيذي قريب من المواطن، ونريد محاسبة أي زول يتلاعب بحقوق الناس، مهما كان منصبه.

 

أبوسعد ما حتكون مهمشة تاني.

الفتيحاب ما حتكون حدائق فوضى وشيشة وحفلات.

الأراضي التاريخية ما حتتوزع في الضلام.

 

*ده ما هجوم، ده حق.*

*وده ما عداء، ده حب للوطن الصغير والكبير.*

 

اللهم احفظ الخرطوم وأبوسعد وأهلها.

 

*#أبوسعد_الفتيحاب*

*#خرطوم_آمنة_بدون_فوضى*

*#المصلحة_العامة_أولا*

‫شاهد أيضًا‬

أطفال السودان في يومهم العالمي: من توثيق الفاجعة إلى استعادة الحقوق وصناعة الأمل

يحلّ العشرون من نوفمبر ليجد طفل السودان في قلب واحدة من أعقد الأزمات الإنسانية المعاصرة، ح…