السودانيين في مصر(١) كيفية الحصول على الإقامة رانيا ابا يزيد

انت كاجنبي تحمل الجنسية السودانية عليك أن تذهب الى مبني جوازات العباسية وانت تحمل الاوراق الاتية:

*صورة الجواز لك انت وأفراد الاسرة

*عقد ايجار موثق.

خطاب من السفاره السودانية (خطاب اذا كنت فرد أو خطاب اسرة اذا كان معاك اي فرد من أفراد اسرتك)من السفارة السودانية بالدقي..وبتستلمو بالجواز .

*فاتورة غاز أو كهرباء

*مبلغ مالي (٢٥دولار) عن كل فرد من الاسرة.

*الحضور باكرا .

*الالتزام بالنظام وتعليمات الضباط .

*استلام الاستمارة وايصال الدفع المالي.

*استلام الرقم لمقابلة الموظف في الشباك المعين داخل الصالة

*الذهاب للصرافة لتغيير العملة والحضور بايصال تغيير العملة وتصويره نسختين.

*الوقوف في شباك البنك وتقديم إيصال تبديل العملة (شرط يكون في نفس اليوم).

ومن ثم الانتظار حتى يأتي رقم تواجدك بشباك موظف الجوازات واكيد بتكون نزلته بياناتك في الاستمارة ورتبت كل الاوراق المطلوبة وبعدها تتصور وتأخذ إيصال استلام الاقامة …

بالنسبه لكبار السن (فوق السبعين)نفس الإجراءات بس هم معفيين من الغرامات بيدفعوال٢٥دولار بس .

الكلام ده للناس عشان تعرف الإجراءات تتعمل كيف خليكم حريصين أنه اوراقكم تكون مكتملة عشان يوم واحد وتنتهو من الإجراء.

*بالنسبة للاجئين :-

من الخيمة برة بتطلع الصاله فوق معاك الاوراق الاتية :-

*صورو من الكرت اي كان نوعه.

*صورة من الرقم المرجعي للإقامة من المفوضيه.

*مبلغ ١٥٥جنيه مصري .

صورة المستند القدمته بيه للمفوضية (رقم وطني_جواز_شهادة ميلاد_بطاقه شخصيه_رخصه )

*بالنسبة لكبار السن وذوي الاحتياجات الخاصة والمرضى تدخل الصالة من المدخل علي يدك اليمين في شباك تكلم الضابط هو بيوجهك اذا في تقرير طبي وبرضه في مكان مخصص بتتعمل كل الإجراءات

تنبيه*

الإجراءات ما صعبة وليست معقدة بس في حاجه لازم ننتبه ليها من دخولك لي مبنى الجوازات الضباط بيسالوك عاوز تعمل ايه؟وعلى اجابتك بيردو عليك ويوجهوك لي مكان جلوسك في الخيمة (عدد كبير من الكنب مرصوص بي نظام يعتمده الضباط صف )ويبدأ توزيع الاستمارات وايصلات الدفع والارقام وانت في مكانك ده ما محتاج منك اي مجهود يعني انت قاعد بيجي الضابط عندك يسلمك وتتحرك تعمل الإجراءات بس في ناس كده بتحب الجوطة تجيك من اخر الخيمة وتقيف للضابط والباقي يجو يقيفو وكده انته بتعطل الإجراءات لأنه زول واقف مافي اي ورقة بيستلمها الا انت قاعد في مكانك ….ما عاوز تتعب نفسك في خدمة اسمها ترابط تدخل الصالة وتدفع قيمة الخدمة ..إن شاء الله المعلومة تكون وصلت بعيدا من الاشاعات …

الى من يهمه الامر :

سفارة جمهورية السودان الدور ينحصر في خطاب السفارة ولكن هناك مشكلة يجب الالتفات لها وهي الفترة التي تستغرقها الاقامة في الصدور اكثر من شهر وهي مدتها ثلاث شهور الرجاء الإنتباه وعمل اللازم والوصول لي حل مع جوازات العباسية المصرية لرفع المعاناة عن السودانيين المقيمين في مصر …