وهج الكلم د حسن التجاني تمبور هل تسمعني…؟!!
تمبور زول وطني (جدع) وزول صادق الكلمة ومؤمن ان السودان بكل قبائله وطن عزيز عليه ولا فرق عنده بين غرباوي وشمالي ونوباوي او غيره كل الناس في السودان عنده (واااااااحد) وتبا للاعداء.
* مصطفي تمبور لم تزحزحه المناصب ولم يسيل لعابه نحوها بل كان ثابتا في كل مفردة تحدث بها خلال معركة الكرامة ولم يتراجع عن كل ما قال يومها وحتي اللحظة هذا يؤكد حديثنا ان تمبور زول متفرد فكرا وعملا عسكريا ومدنيا.
* في الوقت الذي انشغل فيه جبريل ومني بتقسيم السلطة واخذا نصيبهما في اتفاقية جوبا (الملعونة) كاملا ودون وجه حق اصلا .. لان رئيس لجنتها الذي وقع باسم السودان عليها….خائن متمرد هالك…. لكن مصطفي تمبور يوجه المتحركات القتالية بالتحرك نحو الفاشر لفك الحصار فورا ….قال لهم يجب طرد كل المليشيا وقتلها ليس في وسط دارفور ولايته وشمال دارفور فحسب بل كل ولايات دارفور …لله درك يارجل …(انت طلعت من وين ياخ؟)..نوعك ده اليومين ديل ما متوفر نهائي في (السوق) اقصد في السياسة السودانية.
* تمبور يجب ان تسمعني وتقرأ الذي كتبته عنك وسأكتبه ..انت الزول النحن بنفتش ليه ….تتجسد في تعليقاتك معاني الوطنية ونكران الذات وحب الوطن وكراهية المليشيا التي دمرت السودان وجهجهت باكاته بمعاونة (خونة) الوطن داخليا وخارجيا …
* لم يتأثر تمبور بالفتنة وحديث (المارقين) حثالة المجتمع تعامل مع كل هذه الزحمة الفارغة بثبات وانه سوداني وبس…..وان الشمالي سوداني والغرباوي سوداني والشرقاوي سوداني والوسط سوداني وتمبور سوداني (قح) المشكلة وين؟..عفيت منك يا تمبور والله جد.
* كنت اتابع تمبور زمنا واستمع لخطاباته بانصات دقيق واحللها (سايكوجيا وفيزيقيا…وسسيولوجيا) فلم اجد للرجل ثغرة واحدة تحسب ضده… (حاشا لله)…تعجبني فيك درجات الثبات يا تمبور .
* حتي في اجتماعه بحاكم إقليم دارفور مني اركو مناوي ورجالات الادارة الأهلية لم يتزحزح عن حديثه من بدايات المعركة وحتي اللحظة …وهو يجب تطهير السودان من المليشيا…وأعوانه في الداخل والخارج…
* كان لزاما علينا ان نكتب عن مشاركة ومواقف مصطفي تمبور في معركة الكرامة ..وعن القضية السودانية التي يعيشها السودان اليوم …وموقفه الواضح تجاه المعركة والقضية.
* عموما انا أراهن علي تمبور رهانا قويا انه نموذجا سودانيا يجب الافتخار به والعمل علي نسخ ملايين النماذج منه فهو عملة نادرة الوفرة هذه الايام …ففي الوقت الذي يرتزق مجموعة من عملاء الوطن ومن أبنائه ويقبضون (فتافيت) الدولارات ويقدمون وطنهم سلعة رخيصة لاعدائه والمتربصين به بابخس الأثمان يظل تمبور صامدا امينا قويا مخلصا لوطنه ومواطنه…
* طالما نحن لدينا من الكوادر المتفتحة الكارهة للعنصرية والجهوية ونابذة لخطاب الكراهية لن تسقط دارفور ولن يهزم السودان بل سيظل قويا متماسكا وسيتخطي المرحلة بكل هدوء ونجاح غير مسبوق
طالما هناك ما هم امثال تمبور…و(الله الزول ده انا مبسوط منه….(ياخ).
* كان لتمبور ان يعوم ويسبح مع التيار السياسي الجاري هذه الايام بالبلد ولن يلومه احد حينها .. لكنه فضل ان ينبري للرأي العام ويقول كلمته بجرأة ودون تردد بل بثبات وثقة وصدق.
* تمبور الذي لم يحدد فئة بعينها من الشعب السوداني بل وجه رسالته لكل أبناء الشعب الوطنيين هكذا نطق بها لم يقل أبناء المشتركة ولا أبناء دارفور لكن قال لكل سوداني وطني يجب التحرك اليوم قبل الغد لفك حصار دارفور توجيها واضحا….ووجه في نفس الوقت نقدا قويا لموقف المنظمات المخذول والمتردد في موقفهم المخزئ تجاه اهل الفاشر ودارفور والسودان وما لحق بهم من مجاعة وضيق في العيش وموت ودمار …ومازالوا ثابتين صامدين أقوياء لم يتزحزحوا ولم يغادروا بل زادتهم الحرب ثباتا وقوة في الدفاع عن ولايتهم ودارفور وسيكتب التاريخ لهم ذلك بإذن الله…قريبا .
سطر فوق العادة:
اخ تمبور نحن لن ننسي لك كل جهودك ولن نشكرك عليها لأنك ليس باجنبي بل لأنك وطني سوداني صادق النوايا ثابت المبادئ لا تخاف في الحق لومة لائم….انت عارف يا تمبور امثالك في هذا الزمن الا يكونوا يظهرون خلاف ما يبطنون فهذا النوع من العن مخاليق الله …ولكن لاني وصلت لدرجة عالية عندي من القناعة انك أشرف وانبل وانقي سوداني …اقول لك حاشاك ان تكون متملقا كاذبا منافقا بل أنت سوداني وخليك سوداني.
(ان قدر لنا نعود)
مطالبات لمدير المخابرات لتطهير النيابة وتعزيز العدالة دعوات إعلامية لاتخاذ خطوات حاسمة وسط اتهامات بوجود تجاوزات رئيس جمعية صحفيون ضد الجريمة :اي شبهة فساد داخل النيابة ينعكس سلبا” على المنظومة العدلية
تتزايد الدعوات في الأوساط الرسمية والإعلامية بضرورة اتخاذ خطوات حاسمة لإصلاح أجهزة العدالة…
