عبد القادر ابوالقاسم يكتب    قصة بلد

يا بلد شقى في الدروب وشعبو شقيانين

من نال السيادة زمان ما شفنا حالا زين

الساسة في الكرسي شللية متسابقين

في المصلحة العامة يالديمية مختلفين

ودوها لي حفرة وحلانة والله يعين

خلاصة كان عسكر رأي واحد ما رايين

رفعوها ناس عبود من ساسة لعابين

التفوا تاني وجو بي تضحية ثائرين

رجعونا للحفرة وعود الساسة الكضابين

بقينا في حالة تجويع وناس ضايعين

الشعب ضاق خلقو في الثورة عشمانين

ينصلحوا بي ريس وطنية ويملى العين

جانا النميري أسد للدولة يحمي عرين

قاد البلد بالجد لسنين فوق ثلاثين

الحالة ماشة عمار لكن ملانا الدين

زاد الحمل أثقال ردموهو في التموين

الشعب ثار موجوع الحال عديلو متين

الثورة خيار الشعب والجيش بقول امين

مسك السوار شرطو تسليمها منتخبين

قادوها تاني ورا في خلاف ومتحالفين

والشعب ضاق حالوا في الثورة عشمانين

الثورة خيار الشعب والجيش بقول امين

البشير مسك قائد عسكر وناس تانيين

كان الحكم مقسوم ميري وشيوخ الدين

مشت البلد تاني بعد ما كنا مشلولين

وجاطت حقبه زمنيه وضعنا مذري و شين

ولسه الساسه بيحفروا يغشونا بي وشين

خطط بالملي مدروسه قسموا البلد بلدين

باقي الكيكه لسه طريه نيه باقيه عجين

ولعوا نارها ناس حمدوك زفت الطين

وخالد سفه وكم هلفوت عندهم جنسين

قادوا الهالك الرمه للمحراكه كبوا طحين

مرقوا هناك لي بره خلوا الشعب مكلومين

برهان اقيف اسمع عليك الله وكتاب الدين

قود لعزه بالمهله كل الشعب ليك طايعين

كفانا ودار من الساسه العملاء والطامعين

جاتك امانه من الله السلطة امانه ودين

نحنا وراك يا ريس على المنهوكة متعاهدين

وطن خيراتو مردومه نعم مختلفة والنيلين

ارضو الخصبه مجواده فيها المهره فلاحين

جبال شامخه بالعزه وفيها الرفعه بالتعدين

محل ما نمشي بنلقى الخير  وناس طيبين

بلد غنيانا من كلو وفيها الشعب تعبانين

ننهض بيها من تاني تكون الواحة للصابرين

ينعم شعبي خيراتها ونحمي حماها متحدين

مواطن شعلة الانتاج قيادة جيشو محترمين

يد الشعب في يدك نبني بلادنا متكاتفين