وهج الكلم  د حسن التجاني  يا صاحب انين الأنامل سلام…!!

من العوائل العريقة جدا ومعروفة في كل السودان …عائلة درمة …درمة في حسن الخاتمة ودرمة في الشرطة ودرمة في التحكيم وهذا شهير كمحام وحكم اعتقد ان لم اكن مخطئ فقد شاهدت له عدة لقاءات تلفزيونية…حتي الملابس الخاصة بالحكام التي كان يرتديها استاذ جمال حسن سعيد في تمثيل دور الحكم كانت تخص درمة وهذه لها مدلولات اخري اجتماعية كثيرة ليس هذا وقتها… ودرمة في القانون …حفظ الله اولاد درمة واعزهم واكرمهم.

* درمة زول منظمة حسن الخاتمة ده (كوخ) مليان بالاسرار العجيبة وزول نكتة وحاضر البديهة عنده اوسع شبكة علاقات في السودان وربما تمتد لعلاقات خارجه … خاصة مع المسئولين الكبار اما علاقته بربه فهذا امر يعلمه الله وحده اما نحن بني البشر فنشهد له بانه رجل بر واحسان في ستر الانسان ….عجيب درمة له ذاكرة طيبة لا ينسي احد ومتابع

لاجهزة الاعلام والاعلاميين ومعجب بالدار بل مشارك فيها في كثير من الاحيان بالمقالات والحوارات….بارك الله في درمة خاصة في العمل الانساني الذي يقوم به في دفن الموتي …وكنت

عاوز اسمية (الدفان) لكن قلت احسن حسن الخاتمة …ولدرمة ذكريات جميلة مع المرحوم زكريا حامد…وهو الاخر رجل رحمه الله كان انسان جميل ومرح…واذكر كنا في جلسة ووردت سيرة درمة فقلت والله يا ابو الزيك هذا الرجل الاسمو درمة ده زول مهم شديد …عفويا قال لي والله مهم فعلا الان هو مدير اراضي كل مقابر

الخرطوم الولاية ….بعلاقة معاه يختار ليك موقع ناصية ريحك لي جني جناك ….وضحكنا ولم يتوان الا وقرأتها ثاني يوم في مساحته ( حاجة غريبة) ..رحم الله استاذ زكريا حامد وبارك للدومة في عمره

وما تنسانا يا الدومة من الناصية خاصة في بري.

* العقيد دكتور الهادي خضر درمة ده (بني ادم اخر) …من نوع بشر عجيب النوع البركة في كل شئ زول مبروك اصلا لا تتأذي منه اذا لم يصبك منه الخير وحلت بك البركة… زول مهندم انيق ضابط شرطة بمواصفات الزمن القديم الجميل وعطرهم الفواح…رغم صغر سنه مقارنة بعلاقاته بقيادات في الشرطة كبار ووزنهم من العيار التقيل …عموما عائلة درمة عائلة مبدعة في كل شئ واي شئ.

* دكتور الهادي زول عصامي وزول مجتهد به امكانيات ابداعية عالية حفظه الله …يعشق الكتابة والادب والاعلام وصمم له عمود صحفي تحت مسمي جميل اسماه (انين الانامل ) وانين الانامل له دلالاته اخي دكتور الهادي وعدة معاني وتفاصيل تبدأ بالانامل وتنتهي بانينها حين يشتد بها الانين والوجع في حب الوطن والاصدقاء والاحباب ….لله درك من ضابط محترم مشرف برغم (الداء) و(الاعداء) .

* قرأت عبر انين الانامل الاخير ما سطره يراعك الانيق بسؤالك عني ورفيق الدرب لواء دكتور ادريس ليمان …د ادريس يا صديقي درمة صار مهموما بقضايا الوطن فاختار الامساك باعقد ملفاتها وذهب نائبا او قل مساعدا او سمه ما شئت المهم ذهب لملف اللاجئين وما ادراك ما اللاجئين …،ولو سألوك عنها قل …هم كم هائل معقد من المشاكل والتقاطعات فيها الانسانية والاجتماعية والسياسية والامنية و(حاجات تاني حمياني)…وقل لهم هي لله لا للسلطة ولا للجاه .

* ادريس يا صديقي دكتور الهادي زول مخلص ومجتهد كما الشأن عندكم فهو وطني غيور …لذا صعبت عليه الكتابة كما كان اولا كحالنا فنحن نكتب يوميا بلا شفقة علي اناملنا التي ارهقتها الاقلام وانينها …لكنها ربما لم تصلك كما كالعادة …او قد تكون انت ابتعدت قليلا عن تعاطي حروفنا للمشغولية …وكثرة وازدحام العمل ولكن حبك للوهج ولما يكتب د ليمان… وحين يكون الحب صادقا يتسرب من بين الانامل وانينها حروفا شيقة كالتي ارسلتها لنا عبر الاسير تلهفناها وقرأناها واستمتعنا بها حروفا انيقة لها معني في الفؤاد ترعاها العناية …

سطر فوق العادة :

اخي د الهادي درمة …هدية منك مقبولة معناها اني علي بالك انت جميل …وكل القصة لو عارف انا الزول الصحي بريد حرفك وسيرتك وكت يجيبوها.

(ان قدر لنا نعود)