طيب الململة لزومها شنو؟؟

هلع وجشع وململة ما عندها لزوم اصابت الشعب السوداني وتنافس سخيف وصراع غير مبرر في الحصول علي المال..بصورة تصل الحرام بكل معانيه ومفاهيمه ولا احد يعير ذلك اي اهتمام وتوقف.

* ربنا قال في محكم تنزيله… وفي السماء رزقكم وما توعدون… فورب السماء والارض انه لحق مثل ما انكم تنطقون…(الذاريات22..23).. اذا المشكلة وين طيب …الرزق عند ربنا فوق وليس عند البشر….بل فوق في السماء عند ربنا تعالي فوق…يؤتيه من يشاء ويحرمه ممن يشاء بيده الخير وهو علي كل شئ قدير.

* الرزق وجزاء الصوم عند الله فوق …الا الصوم فانه لي وانا اجزي به ….ولو ربنا ترك الرزق في الارض .. عينة حميدتي ما كانت خلت زول حي . كانت شالت ارزاق كل الناس وبعض البشر معروفين بالحسد والغيرة

و(قلة الادب) والطمع والجشع ما كان ادوا زول فرصة معاهم ولساد قانون الغاب كما هو الحال الان مع ال دقلو تبا لهم.

* والله لم يعد احد برزقه …حيث قال وما توعدون… يطلب بذلك السعي لاجل الحصول عليه ولو علم اي شخص برزقه لاختلت موازين الحياة وجلس من جلس وافتري من افتري واتسعت دائرة الظلم وزاد عدد الظالمين.

لكن اراده الله عنده في السماءلوحده .

* وهذه حكمة السماء ان يكون الرزق عند الله وبيده.. يمنحه لمن يشاء وكل مخلوق له عند الله رزق….والمثل بقول (ما شق الله حنكا ضيعه) يعني عنده رزق والرزق ليس هو المال فقط… الرزق الصحة والفهم والتوفيق والشكل ..الوجاهة رزق والشنة رزق والطول رزق والقصر رزق …الناس حصروا الرزق في المال بس وده فهم غلط.

* طموح الرزق يختلف من شخص لاخر في ناس طموحهم رزق كسرة بي ملح وشطة وموية وناس لحوم ومشاوي…وده كله ربنا بسوقك ليه سواقه ان اراده لك في بيوت الافراح والاتراح بسوقك ليه ويحرمك منه ان لم يرده لك.

* مافي زول بشيل رزق زول نهائي …مهما كانت قوته وسطوته الا اذا اراد الله وكل زول رزقه مقسوم ومحدد وموزون ….عشان كده الململة لزومها شنو ؟ والشفقة ليه؟ طالما رزقك عند الله.. اعمل الاسباب وتوكل عليه وانتظر …

سطر فوق العادة:

رغم هذه القناعة التي وصلت قاع نفس كل انسان الا ان الحال لايسر مازال الناس يمارسون شراسة في المنافسة غير الشرعية وحفر تقيل كل ضد الاخر وفتن وحسد وحقد .

واحد لقي زول هادئ ومبسوط ورايق وهو شخص عادي ليس من الاثرياء فسأله من اين لك بهذا الهدوء وراحة البال والسعادة قال له ..علمت ان رزقي بيد الله لا يأخذه احد غيري فاطمأن قلبي…بالله شوف رقي الفهم ده…. تعالوا نتوكل علي الله وندرك معني الاية وفي السماء رزقكم وما توعودون.

(ان قدر لنا نعود)