مشاهير…ارزاق وفضائح..!!

* الشهرة زمان كانت مربوطة بالاشياء الجميلة …الاشياء النادرة زي مثلا انك تجي اول الشهادة السودانية …يذيعوا اسمك في الراديو والتلفزيون …تخترع حاجة جديدة في المجتمع ..ويجيبك التلفزيون ويشوفوك الناس في حاجة تشرف …

* وزمان كانت الشهرة السالبة تنحصر في الناس اصحاب المجال والمتعاملين فيه .لكنها تصل حتي البعاد ..يعني ست (العرقي) المشهورة بعرفوها ناس (الكتحي) بجودة عرقيها ودي حاجة سيئة لكن للاسف مشهورة بي عرقيها ده …يقول ليك ربع كباية من عرقي فلانة (بقفلك ويستفك ويوزنك)…وكله كلام فارغ طبعا

* وتجي شهرة ست الشاي وست الكسرة …وست العيش زي مني سلامة اشهر بائعة عيش في حلفا الجديدة …وتستمر الشهرة لغاية تصل حلاوة المولد عند الطيب سيد مكي عليه الرحمة تلقي الناس متلميين كالنمل وعشرات المحلات حوله تشكو الكساد في البيع في ذات السلعة طبعا مع اختلاف الجودة .. وتجي شهرة عوضية سمك وفولة العرضة …وشية اولاد ام درمان … وفولة ود العباس وسمك السكي وده كله ارزاق..

* .مثلا شهرة سمك عوضية (كده بس) ممكن يكون جارها في الموردة الزنكي بالزنكي….اكثر جودة واحلي طعما…لكن شهرته (مقروصة) امام سمك عوضية ولو ما اكلوه ناس معينيين كأنهم ما اكلوا سمك وده كله ارزاق….

* الغريبة زمان الفنان لو ما ظهر في شاشة التلفزيون …كان (نطط) عديييييل في الحفلات العامة زول بشتغل بيه مافي ولا في زول بسمع بيه ويظل محله (تنتهي شهرته بانتهاءالحفل) ….لكن لو (هنقته) في التلفزيون شهرتك تطير السماء…مشاهير الفن المعروفين بشهرتهم لليوم …وردي ود الامين …اللحو.. ابن البادية الكاشف ..ثنائي العاصمة ..الكابلي ..الجابري.عثمان حسين..ابو داؤود …مشهورين بتحديث اغنياتهم عبر مغنيين جدد رغم وجود عشرات من المبدعين لم تصل شهرتهم كما هؤلاء .

* الشهرة ارزاق اما ان (يمحقك) الله بها او تاكل منها الشهد …وهي انواع فيها نوع يجذب ليك الناس كلهم ونوع يجيب ليك العار وينفر منك الناس ..وتجعلك شخص منبوذ وكريه ومهمل مثالها شهرة حمدوك وسلك ومنقة وعرمان وحميدتي ووجدي صالح للاسف الاخير اشتهر بسرقة الشاشات يعني مشهورين بالشينة …والنوع الاخر يحبب فيك خلق الله ويتمني الناس كلهم يكونوا معاك ..ويا حبذا لو كنت في حفلة ومريض الشهرة صادفك.. ده اصلوا ما بفوتك ببقي ليك في حلقومك عشان يظهر وممكن يلبس اصفر

بس كيف يظهر ويشتهر …يقولوا ليك ياخ الزول الكان لابس اصفر وواقف جنب فلان في الحفلة ده منو …وفلان ده يكون المشهور وهذا يكفي مريض الشهرة غرور وفرح وسرور.

* شهرة لعيبة الكورة رغم انهم من زمن الاستاد كان دار الرياضة المبني سوره ب(الجالوص).. وبعضهم اشتهروا في الاستادات …تذكروا الدحيش ..مصطفي النقر وقاقرين عليهم الرحمة بشارة وتنقا وقرن شطة والمرحوم سامي عز الدين وكمال عبد القادر والمرحوم سبت دودو ..حامد بريمة في حراسة المرمي …وديل مشاهير الرياضة من عشاق ومشجعي الرياضة وغيرهم يعرفونهم من ذاك الزمن والاجيال اللاحقة وشباب اليوم ….ايضا لشهرتهم

هؤلاء نموذج …فقط لكنهم مشاهير اكثر .

* وفي السياسة الزعيم الازهري …الترابي..عبود الصادق المهدي ….زروق ..محمد احمد المحجوب ..الشريف الهندي …المرغني ..عبد الله خليل…النميري ..البشير..سوار الدهب ..الكاهن البرهان …وهذه نماذج ايضا لمع اسمها وذيع صيتها .

* مشاهير الطب….بروف عشميق..بروف ابو عاشة…بروف حميدة ..د عمر محمود …د حسبو سليمان….التجاني الماحي…وبعشر..د كبلو ..بروف مصطفي داؤد .. د خواحة الشهداء ام درمان واخرين.

* مشاهير المجتمع.وظرفاءه.ومثقفيه..د عوض دكام عليه الرحمة…دالكوباني ..دكرار التهامي…درمة…استاذ حسين خوجلي ..د شلقامي ..قدور.. كمال افرو …بابكر صديق نجوم الغد والذي خاب ظنه في غده.

* مشاهير المال…من فتحنا عيونا سمعنا بالبرير والشيخ مصطفي الامين ..واولاد ابو العلا والنفيدي وعلي ابرسي …وعبد الحميد المهدي …وود الجبل وعبدو ربه وبوارث وبعشر وعبد الستار مدني ومحمد عواض مدني واولاد يوسف عبد اللطيف القضارف وعبد المحسن واولاد حسن بخيت جيلاني … واولاد احمد ابوعيسي وحسن ابازيد واولاد شمت وعمر الجعلي والدكتور بكري ربيع عبد الله ..وكمال الزعيم واولاد ربيع حسن بدران من اثرياء حلفا الجديدة …وهناك اثرياء ثراء متدفق ولكنهم بلا شهرة ربما لضعف دورهم المجتمعي والاجتماعي ….ولكن هؤلاء قدامي الراسمالية الوطنية السودانية المعروفين منذ ازمان لم يتزحزحوا ولم يتبدلوا بل ظلوا بفضل الله وعونه ثابتين داعمين للبلاد والعباد حفظهم الله …اما ما جاءوا اخيرا فشهرتهم علي خفيف وسرعان ما اندثروا هم وشهرتهم .

* اندفقت حلة السوشال ميديا في الايام القريبة الفائتة ….وظهرت حقيقة ما فيها من مناكفات و(لغاويس) ومواد فاضحة وشهرة مزيفة للاسف انجرف وراءها كل من يتعامل بها …مغنيات اي كلام ومغنيين اي كلام لكن للاسف محسوبين علي مجتمع السودان وفرضوا انفسهم بتقديم الوضيع الرخيص من فن الغناء…شهرتهم في الفارغة للاسف بل دعارة لفظية وفعلية بصورة مكبسلة يندي لها الجبين…وسخ سلوكي مجتمعي وحثالة بشر من اين اتوا هؤلاء ؟ لم يكن المجتمع السوداني شراهته للشهرة بهذا المستوي السخيف ..تلكم الشهرة التي تتكشف لها (سترة العاري اصلا)….والمدهش ان المجتمع يتلذذ للانجراف لسماع تفاصيلها…وهو الخاسر في خاتمة المشوار .

سطر فوق العادة :

للاسف لو كان يعلم من فكر في وسائل التواصل ان بني البشر سيستخدمونها هكذا …ما كان سعي لتطويرها حد ان تصنع حميدتي اخر… (صنيعة الذكاء الاصطناعي ) في غش فاضح لاستفزاز عقل الانسان الذي ميزه الله به عن سائر مخلوقاته….يوم ان قال تعالي (….ولقد خلقنا الانسان في احسن تقويم….).. سورة التين الاية (4)…صدق الله العظيم.

(ان قدر لنا نعود)